Nýtt skipulag tollamála frá og með 1. janúar 2009
Þann 1. janúar 2009 tóku gildi lög númer 147/2008 um breytingu á tollalögunum númer 88/2005 og fleiri lögum. Breytingin á tollalögunum hefur í för með sér nýja skipan tollamála í landinu. Aðalbreytingin fellst í því að landið er eitt tollumdæmi frá og með 1. janúar 2009 sem heyrir undir embætti tollstjóra. Við gildistöku laganna tók embætti tollstjórans í Reykjavík við réttindum og skyldum gagnvart öllum tollvörðum sem voru starfandi hjá öðrum tollembættum í landinu. Jafnframt breyttist heiti embættisins frá sama tíma í Tollstjóri. Eftir breytinguna verða starfsmenn embættisins tæplega 250 talsins.
Markmiðið með skipulagsbreytingunni er að einfalda skipulag tollamála, jafnt faglega, stjórnunarlega og fjárhagslega enda verður framkvæmd tollamála í landinu á hendi eins embættis í stað átta embætta áður. Gert er ráð fyrir að breytingin stuðli að aukinni skilvirkni, jafnræði og árangursríkari tollframkvæmd auk þess sem henni er ætlað að hafa í för með sér hagræði fyrir atvinnulífið, þegna landsins og þjóðfélagið í heild sinni.
Til baka