Vef-skil
Til að tengjast VEF-skilum Tollstjóra (VEF-tollafgreiðslu og VEF-farmskrárskilum) þarf starfsmaður fyrirtækis að vera með viðurkennd rafræn skilríki.
Viðurkennd rafræn skilríki vegna aðgangs að VEF-skilum eru:
Starfsskilríki frá Auðkenni, sem eru fyrirtækjaskilríki.
Einkaskilríki frá Auðkenni, sem eru einstaklingsskilríki.
Sótt er um rafræn skilríki frá Auðkenni á heimasíðu fyrirtækisins, audkenni.is.
Starfsskilríki frá Auðkenni.
Starfsskilríkin eru fyrirtækjaskilríki.
Á skilríkjunum eru meðal annars upplýsingar um kennitölu starfsmanns og kennitölu fyrirtækis.
Fyrirtæki greiðir sjálft fyrir starfsskilríki hvers starfsmanns og er því eigandi skilríkjanna.
Þegar starfsmaður, sem notað hefur starfsskilríki hættir störfum, getur fyrirtækið því eyðilagt kortið sem geymir skilríkin og jafnframt látið Auðkenni fella skilríkin úr gildi.
Þegar starfsmaður, sem notað hefur starfsskilríki hættir störfum, ber fyrirtækinu að tilkynna Tollstjóra það strax og lokar Tollstjóri þá fyrir aðgang starfsmannsins.
Einkaskilríki frá Auðkenni.
Á skilríkjunum eru ekki upplýsingar um kennitölu fyrirtækis. Einkaskilríkin eru því einstaklingsskilríki en ekki fyrirtækjaskilríki.
Fyrirtæki sem sækir um einkaskilríki frá Auðkenni fyrir starfsmann sinn greiðir sjálft fyrir skilríkin og er því eigandi þeirra. Þó er hugsanlegt að starfsmaður fyrirtækis eigi eldri einkaskilríki frá Auðkenni, sem þá eru eign starfsmannsins sjálfs en ekki fyrirtækisins.
Frá sjónarhóli fyrirtækisins eru einkaskilríkin því hugsanlega ekki eins örugg og starfsskilríkin þegar tengjast á VEF-skilum Tollstjóra.
Þegar starfsmaður, sem notað hefur einkaskilríki hættir störfum, ber fyrirtækinu að tilkynna Tollstjóra það strax og lokar Tollstjóri þá fyrir aðgang starfsmannsins.