Hvert á að senda umsókn um undanþágu greiðslu aðflutningsgjalda?
Meginreglan er sú að sé annað ekki sérstaklega tekið fram beri að senda umsókn um undanþágu, endurgreiðslu eða niðurfellingu aðflutningsgjalda til Tollstjóra.
Umsókn um niðurfellingu aðflutningsgjalda skal borin fram í aðflutningsskýrslu, eyðublaði E1, með því að rita viðeigandi undanþágutilvísun í reit 14 í skýrslunni.
Með því að setja yfirlýsingu um undanþágu á aðflutningsskýrslu er innflytjandi að lýsa því yfir að hann sæki um undanþágu aðflutningsgjalda af tiltekinni vöru í vörusendingu samkvæmt þeim heimildum sem undanþágutilvísun nær til.
Jafnframt felur slík umsókn í sér yfirlýsingu um að innflytjandi skuldbindi sig til að hlíta öllum þeim fyrirmælum, skilyrðum og takmörkunum sem er að finna í nefndum heimildum fyrir undanþágu gjaldanna og ráðstöfun vörunnar.
Umsókn um endurgreiðslu aðflutningsgjalda skal borin fram á þar til gerðu umsóknareyðublaði um endurgreiðslu tolla og annarra gjalda, eyðublaði E20.
Umsókn um lækkun eða niðurfellingu vörugjalds skal beint til Tollstjóra og annast hann jafnframt framkvæmd lækkunar eða niðurfellingar, þ.m.t. tilkynningar til skráningaraðila.
Síðast yfirfarið/breytt mars 2014